D. d. & secundum hunc modum cognoscit nigredinem, & nigrum. ipse enim quasi per contrarium cognoscit. sic cecidit ablatio in exemplari scilicet inter hanc particulam secundum modum, & hanc particulam cognoscit. & est sermo completus per se. sed si aliquid deficit forte est sic. secundum hunc modum intellectus, aut visus cognoscit nigredinem aut nigrum: & vniuersaliter omnes priuationes non cognoscuntur nisi per contraria, scilicet per cognitionem habitus, & per cognitionem defectus habitus. Et hic intendebat per nigredinem priuationem albedinis. ita enim est de sensibus in istis rebus, sicut de intellectu. Quemadmodum enim dictum fuit illic quod visus comprehendit obscuritatem per comprehensionem defectus lu¬. cis, ita intellectus comprehendit priuationem per comprehensionem defectus formae.