Poenitentiam non esse signum, nihil obscurum est. Est enim poenitentia uetustatis nostrae mortificatio, & renouatio spiritus. Sacramentum eius, uel signum, non aliud nisi baptismus est. Atque hic omnium rectissime uocetur sacramentum poenitentiae. Siquidem poe nitentia mortificatio nostri est, in uitam, seu ut renouemur. Id quod baptismo, ut ante dixi, significatur, & testatur Paulus ad Roma. vi. Qui baptizati sumus in Christum Iesum, in mortem eius baptisati sumus &c. Et ad Titum, nuncupatur lauachrum regenerationis. Neque aliud est uita Christiana nisi haec ipsa poenitentia, hoc est, regeneratio nostri. Mortificatio fit per legem ut supra dictum est. Nam haec conscientiam terret & occidit. Viuificatio fit per Euangelium, seu per absolutionem. Non enim aliud est Euangelium, nisi ipsa absolutio. Quod mortificationem nos uocamus, scholastici contritionem uoluerunt dici, id quod ita permitto, si non de dolore per liberum arbitrium, per uires humanas simulato loquantur. Non potest enim odisse peccatum natura. Sed diuinum opus est conscientiam nostram confundere & pauefacere. Hiere. vi. Erubescere nescierunt. Et. xvii. Peccatum Iuda scriptum est stilo ferreo in ungue Adamantino, exaratum super latitudinem cordis eorum. Et. xxxi. Postquam ostendisti mihi percussi femur meum. Et Christus de phariseis Eucae. xi. Nunc uos pharisaei, quod deforis est calicis & catini, mundatis, quod autem intus est uestrum ple num est rapina & iniquitate. Sed haec supra latius, cum de collatione legis & Euangelii dissereremus. Non aliud enim poenitentia est, nisi iustificatio. Interim moneo, ut tamquam pestem caueas scholastica figmenta de attritionibus & de dolore per liberum arbitrium simulato. Facile autem iudicabit cor tuum uere doleas, an simules dolorem. Sed nec dolore tuo fidas, quasi ideo condonetur peccatum que doleat, sed potius ut postea dicam, Absolutione & uerbo dei.