Septima instantia et responsio

Item G: Quod licet isti termini sapientia et iustitia idem omnino significent in Deo, non tamen sunt termini synonymi, et quare. 7o arguitur: aut nomina accidentalia et conceptus correspondentes significant omnino idem in Deo, aut non. Si non, propositum. Si sic, igitur sunt nomina synonyma quod non videtur concedendum.

Respondendum est quod non sequitur propter varias causas. Et haec ad praesens sufficiant quod licet in Deo idem sit omnimode pro quo quodlibet talium supponit, sicut pro suo per se inferiori, alibi tamen unum eorum pro aliquo supponit pro quo non aliud. Aliquid enim in creatura continetur sub conceptu sapientiae transcendente, qui attribuitur Deo quod non sub conceptu amoris vel iustitiae, et sic de consimilibus vel e contra.

Dices: saltem isti termini erunt synonymi divina sapientia, bonitas, et ita de aliis.

Dicendum quod non plus quam isti iste homo et hoc animal, quia iste terminus hoc animal licet nulli conveniat nisi cui ille alius terminus tamen plura significat, quia omnia animalia; non sic alter.